‘’Pítu’’
Situassam de bida kelbez era difícil. Se li na bila cabu ca era sabi, ki fariba na fora.
Crise eh crise ! kelbez carro era mula ku burro ki ta lebaba saco di Bila pa Musteru oh di Bila pa Co-Figuera.
Kel navi ki txuma ‘’Senhor das Areias’’ ki sta na 50 mirrés, ta trazeba 2.500 saco de midju de Praia. El ta dizimbarcaba 2.000 na porto de Fonte-Bila, el ta tuma 2 boti ku 8 braçal, el ta bá tra kelotu 500 na Alcatraz, pa pode distribui carga, pa fica mas perto zona sul, assim burro ka tem ki andaba tustantu camim…
‘’Pítu’’ era fetu de lata zingado. Era moda faze um cartucho ku boca bolado. Hora ki bu dál na saco ‘’PÁTi’’, era só para sakin.
Umbez valdomiro ku Quim di Fidjinha sta bába Fonti-Bila djobe bida, canto és ta txiga baxu ká Nha Zázá, na dixeda Bocarrom, hora kés ta faze curva, és tapa ku 2 burro monzin ku saco selado ta subi. Homi tinha um fátxu burro…el ta selaba és el ta bá ta pôs na camim.
Saco pode teneba: Mindju, assucra, piram, bangolon, bonjim…
Valdomiro bira na Quim, el fral:
-Deus dja da !
Canto el parpa na saco lôlô el da ku Piram ku assucra…
Quin da ‘’pítu’’ na piram, valdomiro da ‘’pítu’’ n’ assucra…Burro da descansa !!! És partil manduco peso…
És bira di lamé, és bá garda ses ranju na casa, és torna funda.
Fidjin era guarda de midju na areia, má el ka ta podeba tadjába ‘’pítu’’.
Tinha mudje na areia ki ta bába só cozeba saco : Auria Natália, Tuda nha marguida, sacorro de Júlia, Angelina…Às vez saco ta binha furado oh rátxádo de navi…por isso ’’pítu’’ ka ta tádjába…
Às vez tambe, Hora ki saco d’assucra modja na mar, minis ta binha trás de braçal, ta txupa bico saco ta baza cálda…
Umbez tambe, binha uns fabona de praia, na saco lôlô, pápá luka, ranja se sakin de fabona el ba ngatxa na pé de rotxa. Passando D’horas, Quim da ku ‘’pítu’’ na saco dum midju branco, boca rodondu, el ranja um obra dum 15 kg, el bá ngatxá’l bera kel de pápá Luka.
Pápá, na hora ba casa, em vez del panha saco ku fába el panha saco ku midju. Quim, canto el bá, el panha saco kel atxa la.
Quim canto txiga casa, el fra Gatim, es fába eh pa ka po mom na él, até segunda ordem, pamó eh de Badiu…Badiu ta mata ! Gatim ku medo fáma badiu, el ka mexe.
Canto és torna tapa na pranassiora, Quim odja ma pápá staba contrariado, el fral sim:
– Ma bo kuse bulibu , homi ?
Pápá ku se rostu marrado, transtornado, raspondel:
– Náh, nhô cala homi…Mi ranja obra dum 15 caneca fába, arguem panhámél…
Quim, cuda d’horas el fral:
-Má nhô go, ki saco kuzé nhô leba casa
Pápá rasponde, boca sperto;
– Mindju…!
Quim pranta grássa, el fral:
– Caprizu, mi po Mindju, canto um bá panha um atxa fába …
Fába era difícil kel tempo…Mindju tinha tudo bila. Pápá luka ki fica de perda.
Na storia de ‘’Pítu’’ ka tinha minin, ka tinha arguem grande, ka tinha fémia, ka tinha mátxu…tud’arguem na ról de mar ta dába ‘’pitu’’. Era da ‘’pítu’’ corré… ‘’pítu’’ ka era rôbu nem fúrtu…era situassam de bida…Braçal tambe, homi de se casa, ta dába ‘’pitu’’.
Bida kel tempo ka era brincadera. Tinha carga ki hora ki binha ta frádu, carga de Nhô Eduardo go ka ta podu mom… Txerrim era prigozu, ka tinha carga kel ka ta dába ‘’pitu’’.
‘’…’’
NOTA DA REDAÇÃO:
Paulo Pina é professor e desportista. Na arte é multifacetado e auto-didata, destacando-se na pintura, e nos anima com suas estórias na pura língua de Fogo.
Boa leitura.
